მოსკოვში კორონავირუსის საწინააღმდეგო მასობრივი ვაქცინაცია რუსული ვაქცინით დაიწყო
პირველ ეტაპზე რისკ ჯგუფში შემავალი ადამიანები : სასწავლო, სამედიცინო და სოციალური მომსახურების დაწესებულებების თანამშრომლები აიცრებიან.
ვაქცინაციის ცენტრები მოზრდილთა პოლიკლინიკებში გაიხსნა, რომელიც დილის 8-დან საღამოს 8 საათამდე იმუშავებს. დედაქალაქში ჯერჯერობით 70 ასეთი ცენტრია გახსნილი. ვაქცინაციისთვის რუსეთის მიერ აგვისტოში დამტკიცებულ ვაქცინას "სპუტნიკ V"-ს იყენებენ.
რუსეთის ვიცე-პრემიერის, ტატიანა გოლიკოვას თქმით, მომავალი კვირის დასასრულიდან ვაქცინაცია რუსეთის ყველა რეგიონში დაიწყება.
რუსული ვაქცინის შემქმნელები ირწმუნებიან, რომ მათი ვაქცინა 95%-ით ეფექტურია.