კარანტინის წესები ქართველებისთვის - არ არის ახლა 200-კაციანი პურმარილების მოწყობის დრო!
ჩვენამდე მოდის მომხმარებელთა ასობით შეკითხვა და ცნობები მათი ქცევის შესახებ. ამ ყველაფრის საფუძველზე ვხვდებით, რომ მიუხედავად ჩვენი და სხვა მედიასაშუალებების თავდაუზოგავი მცდელობისა, მოსახლეობას არ აქვს სწორი ინფორმაცია გამოცხადებული პანდემიის დროს ქცევის წესების შესახებ.
მეგობრებო! სახელმწიფო იმისთვის აცხადებს საკარანტინო რეჟიმს მთელი ქვეყნის ტერიტორიაზე, რომ თავიდან ავიცილოთ ვირუსის გავრცელება და ისეთი აფეთქება, რაც ევროპის რამდენიმე ქვეყანაში მოხდა. ჩვენ კი ამას ხელი უნდა შევუწყოთ ჩვენი კეთილსინდისიერი ქცევით.
და რას გულისხმობს ეს კეთილსინდისიერება?
არ არის მარტივი დღეების განმავლობაში შინ ჯდომა და იმაზე ნერვიულობა, თუ რა იქნება ხვალ, მაგრამ გვერწმუნეთ, გაცილებით უფრო რთული იქნება სიტუაცია, თუკი ვერ გავაცნობიერებთ იმას, რა მოყვება ჩვენს არასწორ საქციელს.
არ შეიძლება ამ პერიოდში მასობრივი თავყრილობების ორგანიზება!!!
გასაგებია, რომ გვიყვარს შეხვედრები, სუფრები, მაგრამ, ყველამ უნდა გავიგოთ, რომ ახლა ამის დრო არ არის!
ნუ მოიწვევთ ახლობელ-მეგობრებს დაბადების დღეებზე და ნურც თქვენ წახვალთ სტუმრად! ნათესავების მონახულებაც გადადეთ ცოტა ხნით, ვიდრე განიმუხტება მდგომარეობა. არ არის ახლა 200-კაციანი პურმარილების მოწყობის დრო!!! არც უცხოელ სტუმრებთან სტუმართმოყვარეობის მტკიცების სიტუაციაა დღეს.
ბევრი რამ არის დამოკიდებული იმ ადამიანის ქცევაზეც, რომელიც თავს შეუძლოდ გრძნობს, ახველებს, მსუბუქად გაციებულია - ის შეიძლება მძიმედ არ არის, მაგრამ იყოს ვირუსის მატარებელი და მის მიერ ასეულობით დაინფიცირებულ ადამიანში ცუდი შედეგები მივიღოთ.
დარჩით შინ! თუ სასიცოცხლოდ მნიშვნელოვანი არ არის, ნუ გახვალთ სახლიდან. ნუ წახვალთ სტუმრად, თუ ადამიანებთან კომუნიკაცია გიწევთ, დაიცავით დისტანცია მათთან ურთიერთობისას.
ნურავის გადაკოცნით! ცოტა ხნით ყველა ამ წესის დაცვა არის აუცილებელი.
მთავრობა ალბათ მიიღებს აკრძალვებს ამ მიმართულებით, მაგრამ თუ ჩვენ არ გავიგეთ ამის მნიშვნელობა, ჩვენ არ გამოვიჩინეთ პასუხისმგებლობა და ზუსტად არ შევასრულეთ მითითებები, ძალიან მძიმე შედეგებს მივიღებთ.
გთხოვთ, გააზიაროთ ეს მითითებები და გაუზიაროთ თქვენს ახლობლებსაც!
გავუფრთილდეთ ერთმანეთს! დავიცვათ ჩვენი ქვეყანა, ჩვენი ხალხი განსაცდელისგან!