პროლაქტინის მნიშვნელობა და მასთან დაკავშირებული პრობლემები
პროლაქტინი ჰორმონია, რომელიც აკონტროლებს ლაქტაციის დაწყებას და შენარჩუნებას, ის უშუალო გავლენას ახდენს ქალის შვილოსნობაზე, აქედან გამომდინარე, ის ერთ-ერთი მთავარი ჰორმონია, რომლის კვლევაც პირველ რიგში ინიშნება გინეკოლოგიური პრობლემის გამორიცხვის მიზნით.
ჰიპერპროლაქტინემიამ ანუ პროლაქტინის მაღალმა დონემ შესაძლოა გამოიწვიოს ანოვულატორული უნაყოფობა, მენსტრუალური ციკლის დარღვევა ან შემცირება, თავის ტკივილი, მხედველობის პრობლემები, რძის გამოყოფა სარძევე ჯირკვლებიდან ლაქტაციის პერიოდის არარსებობისას.
სისხლში პროლაქტინის შემცველობა იზრდება ფიზიოლოგიური მიზეზების გამო, კონკრეტული პრეპარატების მიღების გამო, ფსიქოლოგიური სტრესის დროს, ალკოჰოლის ხშირად მოხმარებისას, ძლიერი და რეგულარული ფიზიკური დატვირთვის დროს და უძილობის პრობლემების გამო.
თუმცა, შესაძლებელია მიმდინარეობდეს უსიმპტომოდაც.
გამომწვევი მიზეზები
გამომწვევ მიზეზს შორისაა ჰიპოფიზის ადენომა, ფარისებრი ჯირკვლის ფუნქციის დაქვეითება, თირკმლის ქრონიკული დაავადებები, სხვადასხვა მედიკამენტებით ხანგრძლივი მკურნალობა( მედიკამენტოზური ჰიპერპროლაქტინემია)
თუმცა, ჰიპერპროლაქტინემია შესაძლებელია გამოწვეული იყოს უმიზეზოდ, იდიოპათიურად.
ჩამოთვლილი სიმპტომებიდან რომელიმეს არსებობის შემთხვევაში, ენდოკრინოლოგთან ან გინეკოლოგთან ვიზიტისას ანამნეზის შეკრების შემდეგ ექიმი ნიშნავს კლევას, სწორედ სპეციალისტი განსაზღვრავს ზუსტად რა პერიოდში არის მიზანშეწონილი კვლევის ჩატარება, რადგან ძალიან დიდი მნიშვნელობა აქვს დაცული იყოს შესაბამისი რეკომენდაციები.
რეკომენდაციები:
სისხლის შრატის აღება მნიშვნელოვანია მოხდეს სრულყოფილი ძილის შემდეგ, დილით ადრე, გაღვიძებიდან არაუმეტეს 2-3 საათამდე.
მნიშვნელოვანია, რომ უშუალოდ სისხლის აღებამდე პაციენტი მოერიდოს დატვირთვას და მაქსიმალურად მოსვენებულ მდგომარეობაში მოხდეს სისხლის აღება.
სისხლის აღება უნდა მოხდეს მენსტუალური ციკლის პირველ ფაზაში (მე-2/5 დღეს)
თუ მაღალი პროლაქტინი დაფიქსირდა, აუცილებელია დამატებითი კვლევების ჩატარება, ჰიპერპროლაქტინემიის მიზეზის დასადგენად, რომელსაც განსაზღვრავს სპეციალისტი.
