სტენტირება კრიტიკულად შევიწროებული სისხლძარღვის ლითონის კონსტრუქციით - სტენტით გაფართოებაა, რომელიც გულის მკვებავი სისხლძარღვების ნორმალური მუშაობის აღდგენას და გულის ჟანგბადით ნორმალური მომარაგების უზრუნველყოფას ისახავს მიზნად.
კორონარული სტენტირება
რა არის სტენტი? სტენტი ლითონის მილია, რომელიც ჩაკეცილი მიეწოდება დაზიანებულ სისხლძარღვამდე, შემდეგ სპეციალური ბალონის საშუალებით იშლება და იბერება.
უკვე გაშლილი სტენტის ხელახალი ჩაკეცვა წარმოუდგენელია, რამდენადაც იგი მჭიდროდ ეკვრის სისხლძარღვის კედელს, ხორცდება მის სისქეში და იწყებს მასზე დაკისრებული მისიის შესრულებას – აფართოებს სისხლძარღვის სანათურს
მანიპულაციისას პაციენტებს სტენოკარდიის მსგავსი შეგრძნებები აქვთ, რაც რამდენიმე წამი გრძელდება. სტენტის მთავარი ფუნქცია დახშული სისხლძარღვის სანათურის გაფართოება და ამ მდგომარეობის შენარჩუნებაა, რაც საკმაოდ დიდი დატვირთვაა, სწორედ ამიტომ სტენტები დამზადებულია საკმაოდ მაღალხარისხიანი ლითონური შენადნობებისგან.
სტენტები ერთმანეთისგან განსხვავდებიან როგორც მასალით, ისე დიამეტრითა და სიგრძით. არსებობს ჩვეულებრივი ლითონური სტენტები, რომლებიც ყველაზე ხშირად გამოიყენება უპირატესად საშუალო დიამეტრის არტერიების გასაფართოებლად. ცნობილია ე.წ. წამლიანი სტენტები, რომლებიც დაფარულია სპეციალური სამკურნალო პრეპარატით, რაც დაზიანებული სისხლძარღვის მკურნალობას სტენტირების შემდგომაც განაგრძობს, შლის ქოლესტერინულ ფენებს და იქ მათი ხელახალი განვითარების - რესტენოზის ალბათობას მინიმუმამდე ამცირებს.
ისინი ჩვეულებრივზე შედარებით ძვირადღირებულია და მათი გამოყენების შემდგომ აუცილებელია ანტითრომბოციტული პრეპარატების ხანგრძლივი მიღება – დაახლოებით 12 თვე, ეს ის დროა, რომლის განმავლობაშიც სტენტი გამოყოფს სამკურნალო საშუალებას. წამლიანი სტენტები უპირატესად მცირე დიამეტრის მქონე არტერიებში გამოიყენება, სადაც ახალი სტენოზის განვითარება გაცილებით სავარაუდოა, ვიდრე საშუალო და მსხვილკალიბრიან არტერიებში.
როგორ ტარდება სტენტირება? მანიპულაცია ტარდება სპეციალური მოწყობილობის საშუალებით, რომელიც გულის მუშაობის მუდმივი რეგისტრაციის საშუალებას იძლევა. სტენტირებისას სხეულზე დიდი ჭრილობა არ კეთდება, მანიპულაცია ხორციელდება ადგილობრივი ანესთეზიით, ექიმის თხოვნით პაციენტს ეძლევა საუბრისა და საკუთარი შეგრძნებების გამოხატვის საშუალება.
უშუალოდ პროცედურისას თეძოს ან მტევნის სისხლძარღვში შეჰყავთ კათეტერი, რომელშიც შედის სპეციალური, თხელი ლითონის გამტარი მონიტორზე გამოსახულების მისაღებად და პაციენტის მდგომარეობის საკონტროლოდ. გამტარი აღჭურვილია სპეციალური ბალონით, მასში ჩამონტაჟებულია დაკეცილი სტენტი
