თამბაქოს მოწევა დნმ-ს აზიანებს
თამბაქოს კვამლის ზოგიერთი კომპონენტის ზემოქმედებამ შესაძლოა დააზიანოს დნმ-ი, კერძოდ, ქრომოსომებში ნაწყვეტების წარმოქმნას შეუწყოს ხელი. მუტაგენურობის თვალსაზრისით კი ეს ერთ-ერთი ყველაზე სახიფათო გადახრაა. ამ დროს დნმ-ის თავისუფალი მონაკვეთები ჩნდება, რაც თავის მხრივ ქრომოსომათაშორისი კომპლექსების წარმოქმნას იწვევს. შედეგად გენების ერთ მონაკვეთს მეორე ენაცვლება.
აღნიშნული ექსპერიმენტები მეცნიერებმა უჯრედოვან კულტურებზე ჩაატარეს, თუმცა, როგორც მკვლევარები ირწმუნებიან, თამბაქოს კვამლი ადამიანის უჯრედებზეც ანალოგიურ ზემოქმედებას ახდენს. მიღებული მონაცემები მოწმობს, რომ სიმსივნის განვითარების ალბათობა პირველივე მოწეული სიგარეტის შემდეგ იზრდება, განურჩეველად იმისა, უკანასკნელი აღმოჩნდება ის თუ ერთ-ერთი იმ ათობით ათასიდან, რომელსაც აქტიური მწეველი მთელი სიცოცხლის განმავლობაში ეწევა.
თინათინ გოცაძე