მოტეხილობებს მალე თაბაშირის გარეშე უმკურნალებენ
ფაქტია, რომ მეცნიერება წინ მიდის და ამ სფეროში მოღვაწე მეცნიერები ტრადიციული თაბაშირის ნახვევის შეცვლისთვის ისეთი ინოვაციური ინსტურმენტების გამოყენებას გვირჩევენ, როგორებიცაა ულტრაბგერითი თერაპია, ღეროვანი უჯრედები და გენური ინჟინერიაც კი. ყოველივე ეს მოტეხილობათა მკურნალობის უახლესი ტექნოლოგიებია, შემუშავებული ამერიკის შეერთებულ შტატებში.
"ჩვენ შევქმენით მოტეხილობის შედეგად დაზიანებული ძვლოვანი ქსოვილის სწრაფად აღდგენის (შეხორცების) მეთოდი. ამისათვის ვიყენებთ ულტრაბგერით რხევებს ღეროვან უჯრედებში სპეციფიკურ გენთა აქტივაციისთვის. შედეგად ღეროვანი უჯრედები ტრანსფორმირდებიან (გარდაიქმნებიან) ძვლოვანი ქსოვილის უჯრედებად და უზრუნველყოფენ ძვლოვანი ქსოვილის შეზრდას", - აცხადებენ ახალი ტექნოლოგიის ავტორები, ლოს-ანჟელესში არსებული სამედიცინო ცენტრის _ სიდარს-სინაის თანამშრომლები.
დამოუკიდებელ ექსპერტთა აზრით, მოტეხილობათა მკურნალობის ამ ახალ მეთოდს კარგი პერსპექტივა აქვს. ეს ტექნოლოგია, სავარაუდოდ, ძალიან მალე რეალურად დაიმკვიდრებს პოზიციას და ნამდვილ რევოლუციას მოახდენს ძვლების მოტეხილობათა თერაპიაში.
თინათინ გოცაძე