ხერხემალი და მჯდომარე სამუშაო
- ბრიტანელმა მეცნიერებმა დაადგინეს, რომ მჯდომარე სამუშაოს მქონენი თავიანთ აქტიურ თანატოლებზე ათი წლით ადრე ბერდებიან;
- ამერიკელებმა კი დაადასტურეს, რომ მჯდომარე სამუშაო, კომპიუტერული თამაშები, ტელევიზორის მრავალსაათიანი ყურება - ორგანიზმში სერიოზულად ცვლის მეტაბოლურ პროცესებს, რის შედეგადაც იმატებს წონა, ზიანდება სისხლძარღვები, მხედველობა, საჭმლის მომნელებელი ტრაქტი და რაც მთავარია, სერიოზული ზიანი ადგება ხერხემალს.
როგორც ხვდებით, კომპიუტერთან ჯდომის მანერის შეცვლა და ფეხსაცმლის ქუსლის დამოკლება ვითარების გამოსასწორებლად საკმარისი არ არის. 8 სამუშაო საათის მანძილზე ჯდომა და კიდევ შინ გატარებული დრო - უკვე სერიოზული დატვირთვაა ხერხემლისთვის. ამ შემთხვევაში აუცილებელია რამდენიმე სასარგებლო ჩვევის გამომუშავება, რომელთაც ახლა გთავაზობთ:
სწორი კვება
ხერხემლისთვის სასარგებლო პროდუქტებია:
- მიკროელემენტები - კალციუმი, მაგნიუმი, ფოსფორი - მათ ძირითადად ცხოველური საკვები შეიცავს. ეს, პირველ ყოვლისა, რძის პროდუქტებია, განსაკუთრებით - ყველი, დიდი რაოდენობით ამ ელემენტებს შეიცავს თევზი და შედარებით ნაკლებია ხორცში, ზოგიერთი ბოსტნეული ასევე მდიდარია კალციუმით, მაგალითად, კომბოსტო.
- ამინომჟავები - ეს ცილა ელასტინისა და კოლაგენის საშენი მასალაა, ყველაზე დიდი ოდენობით მათ ცხოველური პროდუქტები შეიცავს, ამ კუთხით ერთობ მდიდარია ნახარშები და საცივი. ხორცის ნახარშის საცივი გარეგნულადაც ძალიან წააგავს ხრტილს და ეს შემთხვევითი სულაც არ არის. ხარშვისას ნახარშში საქონლის ძვლებიდან ხერხემლისთვის საკმაოდ ბევრი სასარგებლო ნივთიერება გადადის.
ზემოთ ჩამოთვლილი პროდუქტები ამდიდრებს ორგანიზმს სხვადასხვა ჯგუფის ვიტამინებითაც. ჩვეულებრივ, ხერხემლისთვის აუცილებელია A ვიტამინით მდიდარი სტაფილო, კვერცხი, საქონლის ღვიძლი, ჩ ვიტამინით მდიდარი ციტრუსები, ხილი და ბოსტნეული.
ზურგის კუნთების დაძაბულობის მოხსნა და მასაჟი
ზურგის კუნთების დაძაბულობის მოხსნა და მასაჟი სასურველია, სპეციალისტმა შეასრულოს. მხოლოდ პროფილაქტიკური მასაჟისთვის კი, მთავარია, ზურგის კუნთების მოდუნება ისწავლოთ.
აქტიური დასვენება, ხანგრძლივი სეირნობა
შეეცადეთ კვირაში ერთხელ საერთოდ არ დაჯდეთ, დრო სიარულს, სირბილს მოანდომეთ ან წამოწოლილმა გაატარეთ.
ამ მეთოდით შეძლებთ ხერხემლისთვის მიყენებული ზიანის შემცირებას.
წესი 1
მუშაობისას აუცილებელია მცირეხნიანი პაუზები და შესვენებები. 40 წუთში ერთხელ დგებით და მსუბუქად ვარჯიშობთ, ან უბრალოდ წელში იმართებით და დადიხართ;
წესი 2
მუშაობის დროს სხეული გასწორებულია. მოხრილი ხერხემალი უფრო მეტად იტვირთება, გარდა ამისა, თუ ნებით ცდილობთ წელში გამართვას, ასე ზურგის კუნთებს ამაგრებთ და მათ კიდევ უფრო გამძლესა და ამტანს ხდით. ეს კი დატვირთვებთან გამკლავების საუკეთესო გზაა.
ყველაფერი ასე მარტივად როდია, საჭირო ვარჯიშების შესახებ ინფორმაცია, უმჯობესია, სპეციალისტისგან მიიღოთ.
წესი 3
დიდი ყურადღება უნდა მიაქციოთ სამუშაო და საძილე ადგილის ორგანიზაციას. საჭირო მოთხოვნებს უნდა აკმაყოფილებდეს სამსახურის მაგიდა და სკამები - გასათვალისწინებელია მათი სიმაღლე და სიგრძე, სავარძელი კი არც ძალიან მაგარი უნდა იყოს და არც ძალიან რბილი.
საძილე აქსესუარებიდან ნახევრად მყარი ლეიბი და მომცრო ბალიში ამჯობინეთ.
წესი 4
საყურადღებოა ფეხსაცმელი - ის უნდა იყოს მოხერხებული, კომფორტული, არავითარი მაღალქუსლიანი, ტერფი უნდა ამორტიზირებდეს სიარულისა და ნაბიჯების გადადგმისას – სხვა შემთხვევაში სიარულისას რხევა ხერხემალს გაგიმრუდებთ და სერიოზულად დააზიანებს მას.
წესი 5
თავი არიდეთ ტრავმებს, რაც ხერხემლის დაზიანების დამატებითი რისკფაქტორია.
ზურგი და მჯდომარე სამუშაო
მჯდომარე სამუშაოს მქონეთათვის ხერხემალთან დაკავშირებული პრობლემები, თითქმის ყოველთვის, ზურგის არეში გაჩენილი ყრუ ტკივილებით იწყება, მოგვიანებით კისრის გაშეშების შეგრძნება და სხვა უსიამოვნო სიმპტომები იჩენს თავს. ამგვარი ნიშნები შესაძლოა ისეთი სერიოზული დაავადების მაუწყებელი იყოს, როგორებიცაა სკოლიოზი და ოსტეოქონდროზი, ამიტომ საგანგაშო ნიშნების მიღებისას დროულად ეჩვენეთ სპეციალისტს.