რატომ აირჩიეს იოდით გასამდიდრებლად მაინცდამაინც მარილი
ხდება სხვა პროდუქტთა იოდით გამდიდრებაც, თუმცა მარილი ამ თვალსაზრისით შეუცვლელია, - ამბობს „მკურნალი.გე“-სთან საუბრისას ენდოკრინოლოგი დავთ მეტრეველი.
მისი თქმით, ის ერთადერთი მინერალია, რომელიც საკვებს სპეციალური ქიმიური დამუშავების გარეშე ემატება. ამასთანავე, მას მოიხმარს მოსახლეობის ყველა ფენა, განურჩევლად სოციალური თუ ეკონომიკური სტატუსისა. მისი დღიური ნორმის დიაპაზონი (საშუალოდ 5-10 გ) მცირეა და არ არის დამოკიდებული ასაკზე, სქესზე, სეზონზე.
იოდდეფიციტის პროფილაქტიკისთვის მარილის მოხმარების გაზრდა არ არის საჭირო. მარილი უნდა მოვარიდოთ ნესტსა და მზის სხივების უშუალო ზემოქმედებას. მისი შენახვა სასურველია მჭიდროდ დახურულ მუქ ჭურჭელში. იოდიანი მარილი კერძს არა მომზადებისას, არამედ ქურიდან გადმოდგმის შემდეგ უნდა დაემატოს, ვინაიდან მაღალი ტემპერატურა იოდის ინაქტივაციას იწვევს.
მჟამად მსოფლიოს 40 ქვეყანაში მოქმედებს მარილის იოდირების უნივერსალური პროგრამა, რაც მოსახლეობისთვის მხოლოდ იოდიანი მარილის მიწოდებას ითვალისწინებს.